En ul lec'h boemus emañ staliet ar c'heginer meur Laurent Saudeau gant e skipailh a 15 den, Maner ar Boulaie, e Gorre-Goulen a zo war-hed 10 km e su Naoned. Ar preti nemetañ eo el Liger-Atlantel div steredenn dezhi. Peadra da reiñ c'hoant deomp da vont da welet...

Penaos oc'h kouezhet e chidourenn ar c'heginañ ?
O tont eus ur familh a vicherourien voued e oan ha kroget on abred gant ar c’heginerezh. Dibluañ yer, fardañ ha gwerzhañ anezho, setu penaos on bet lakaet e-barzh an traoù. Er gêr e tebremp mat, atav e veze produioù mat, kig ha charkuterezh a-feson, legumaj eus ar c’hentañ, ha ma mamm a oa ur geginerez vat. Ganti em eus desket keginañ. Dalc’het e oa bet ur gourmarc’had bihan gant ma zud ha da c’houde ur preti evit ar predoù eured dreist-holl. A-gaoz d’an holl draoù-se em eus bet c’hoant da vont d'ur skol-pretierezh, aet on neuze da Noirmoutier da 16 vloaz. Ha da 18 vloaz e ouien e felle din labourat evel keginer. Kement ha keginañ, koulz en ober gant ar re wellañ, hag unan anezho a zo c’hoazh mil vrudet, Joël Robuchon an hini eo, bet en doa bet 3 steredenn gant Michelin dindan 3 bloaz. Etre 1981 ha 1983 ma'm eus soñj mat.

Atav ho peus labouret e pretioù douget d’an traoù lipous ?
Ya, atav em eus bet c'hoant da labourat gant ar re wellañ. Kaset em eus 70 lizher war-lerc'h ma studioù, n’em eus bet nemet ur respont digant La Bonne Auberge en Antibes, div steredenn. Dalc’het e oa gant Jean Rostang, unan eus ar chefed brudetañ er bloavezhioù '60. Kroget on evel komis, gwelet em eus pegen diaes e c’hell ar vicher bezañ : eurvezhioù hag eurvezhioù labour, nebeut-tre a brantadoù diskuizh… Met pa vezer entanet gant un dra bennak ! [...]

Komzoù dastumet gant Joan Bizien